Invito | Loko | Programo | Aliĝo | Arkivo
http://esperanto-bw.de/seminario-eo
BAVELO kaj Espéranto France-Est invitas al
Gaja semajnfino
1a - 3a septembro 2023
en Rottweil
la plej malnova urbo de Baden-Virtembergo
Lerni Esperanton estas plezuro. Ĉefe komune. Kaj speciale en internacia rondo. Franca-germana. Ĉe nia „Gaja Semajnfino” regas aktiveco. Kaj amikaj interparolado instigas al plia lernado. Ni ensorbas Esperanton en feria atmosfero.
Rottweil estas la plej malnova urbo de Baden-Virtembergo, sed ĝi posedas unu el la plej novaj allogaĵoj, nome turon de kvaronkilometra alteco kun la plej alta germania platformo por elrigardi. Firmao Thyssen-Krupp konstruis ĝin por testi siajn liftojn. De oktobro 2017 la turo estas alirebla por la publiko.
Jam imponas la ekstera aspekto: Por mildigi la forton de vento la turo estas tegata per ŝtofo, kaj lumo kaj ombro daŭre ŝanĝiĝas.
Ankaŭ laŭ sia eno la turo elstaras: Liftoj estas testataj - foje pluraj liftoj veturas en la sama ŝakto. Kiel tio eblas? Granda demando. La respondon ni ekscios surloke, ĉar en la dimanĉa mateno ni mem esploras la turon dum komuna ekskurso.
Sed ne nur la liftoj estas interesaj. Jam la konstruado de la turo montras plurajn rekordojn. (La plej scivolemaj inter vi jam nun povas spekti jutuban tempoakcelitan filmeton Konstrui altan turon en 7 minutoj : youtu.be/VIhbyrxdNhE).
Sabate posttagmeze ni tradicie ekskursas, ĉi tie en Rottweil ni esploras la urbon, kiun la Romianoj fondis en la jaro 73 p.K. do, antaŭ 1950 jaroj! Gratulon Rottweil ni venos por kunfesti :-)
Ambaŭ ekskursoj estas elstaraj, ĉar ni sukcesis dungi oficialan ĉiĉeronon por urbo kaj turo, kiu lernis Esperanton nur por gvidi nin - sen ia traduko - rekte en Esperanto. Vi, do, ĝuos profesian kaj esperantan gvidadon tra la historia urbo kaj la teknika turo.
La solvo de la enigmo: ĉiĉeronos por ni Christoph Frank.** - Do jam nun ĝoju, ke vi spertos kompetentan gvidadon al interesaj vidindaĵoj.
Se jam la ekskursoj havos tiom da kulminoj, ankaŭ la kursoj estu interesegaj. Tial ni denove proponas gajan semajnfinon kun viaj kontribuoj. En la centro de niaj aktivecoj estu viaj interesoj kaj talentoj kaj iniciatemo. Ĉu vi okupiĝas pri temo, ĉu historia, ĉu biologia, astrofizika, ĉu profesia, medicina ĉu ... ĉu ... jen longe sopirata ŝanco por vi, paroli pri ĝi. Aŭ eble vi ludas muzikon aŭ kantas aŭ prezentas ... Kion ajn, dividu vian entuziasmon, sciigu nin pri via pasio.
Krom la unua·horumado por komencantoj la „kursoj” ne okazas laŭ la „klasika” modelo kun unu instruisto kaj ĉiuj aliaj kiel lernantoj, sed kiel kontribuo de kolego al kolegoj.
La junulargastejo gastigas nin por tranoktado, maten- kaj vespermanĝoj. Dumtage ni uzos - se ni ne ĵus ekskursas - la salonojn en La leporo (Interkulturelles Zentrum Hasen, Hauptstraße 69) .
Dankon pro la fotoj al: Stadt Rottweil, Testturm, Christoph Frank
_____
** (verkinte ĉi-tekston mi (=UN) nur iomete troigetis asertante, ke Christoph Frank lernis Esperanton nur por gvidi nin. ;-)
