Esperanto-Tago 2012 en Konstanz

Kiam la dorlothundeto pisas en la aĉetsakon

Ĝojkriantaj infanoj dum la jubileo 125 jaroj de Esperanto en Konstanz

Gaja festo fariĝis la 125-a reveno de la naskiĝjaro de la planlingvo Esperanto (1887-2012), kiun Baden-Virtemberga Esperanto-Ligo solenis je la 28-a de aprilo 2012 en la Kolping-domo de Konstanz. Oni babilstile prezentis la temon Esperanto. La gazeto Südkurier raportis en pluraj artikoloj okaze de la jubileo.

Komence de la jubilea aranĝo la infana grupo de la koruso Münsterchor Konstanz kantis tri viglajn infankantojn en la germana kaj en Esperanto. Esperanto-artisto, sorĉisto, pupteatristo kaj ventroparolisto Christoph Frank de la teatro Die Zauberbühne Rottweil amuzigis la etajn kantistojn kaj la publikon per la nekonvena konduto de sia "poŝhundo" Snuffi, kiu formanĝis la manuskripton de la artisto.

Bunta bildo de la Esperanto-vivo en Baden-Virtembergo prezentiĝis kadre de 15 mallongaj intervjuoj babilstile, dum kiuj dekduo da aktivaj Esperanto-parolantoj, ĉiuj el Baden-Virtembergo, montris, kiel ili aplikas Esperanton por siaj interesoj kaj rilatigas ĝin al sia persona engaĝiĝo. Ili ilustris, ke Esperanton eblas ligi kun ajna hobio.

Ĉu interparoloj pri ĉiutagaj aŭ pri sciencaj temoj, Esperanto evoluigis dum siaj 125 jaroj sian vortprovizon al plenvalora lingvo per uzado en ĉiuj kampoj de la vivo.

La komuna kantado de la Eŭropo-himno de Ludwig van Beethoven en Esperanto, mallonga fotoprezentado el la "famili-albumo" de Baden-Virtemberga Esperanto-Ligo kaj tosto honore al la juna, sed maturiĝinta lingvo bele kompletigis la aranĝon.

Alois Eder

Pri la fotoj - la tago konsistis el: Antaŭtagmeze soleno, poste tagmanĝo, posttagmeze urbopromenado kaj ŝipekskurso, kafopaŭzo, jarĉefkunveno. Ĉio dum belega tago kun brilanta suno kaj someraj temperaturoj.